Aktuell – 03.03.2013

Bissig: Basler Fasnacht zu SRF und BAZ

Die  Basler Fasnacht 2013 ist vorbei. Die Schnitzelbänke aber sind immer noch da: Das Schnitzelbank-Comité Basel präsentiert "die besten Verse der Comitébängg". Eine Reihe davon befasst sich auch mit Medien; EDITO+KLARTEXT hat sie aussortiert:

Schnitzelbänke zu SRF:

Heiri:
Y telefonier mym Tierarzt: Do isch dr Heiri, dr Buur.
Herr Doggter d Milch vo myne Chüe wird scho bim Mälche suur.
Loos, stell bim Mälche s Radio ab, au e Chue cha s nid verträäge,
wenn ständig eine S S S S SRF duet sääge.

Die Polyvalänte:
E Cappuccino, e Ristretto, e Latte Macchiatto, bitte scheen.
Nur Gruftis bstelle hit no Schale oder Kaffi Crème.
Us DRS wird SRF s’isch kompliziert dochs git Rendite.
Nur d’UBS die machts uns lyycht, die blyybe schlicht Bandite.

Schwoobekäfer:
Benissimo isch umme; au d Arena gfallt nüm alle.
D Talänt sin zem Vergässe und es klemmt d Millione-Falle.
Dr Epiney wird elter und dr Emil wird nit glatter.
Drum bruucht au s Schwyzer Färnseh jetz e aigene Bestatter!

Singvogel:
Guten Morgen, Radio S R S R F
S R F R F S F S F R F.
Wir bringen heute stündlich Wetter und Verkehr.
Das wars. Guet Nacht, ihr Radio S F S F R.

Stächpalme:
S Färnseh setzt d Miss Schweiz-Wahl ab.
Das überläb i grad no knapp.
Benissimo isch tragischer, dr Beni winkt ade:
Är well sich d Chugele geh – und wüss nid, weli neh.

Werbung

Schnitzelbänke zur BaZ:

Anggewegglimaitli:
D BAZ-Druggerey isch laider verschwunde,
En Ersatz hänn si numme z Ziiri gfunde.
Z Basel springt kai Drugger in d Lugge,
Es schämme sich alli, das Kääsblatt z drugge.

Dootebainli:
Lut BaZ duet z Baasel uf de Strosse d Gwalt regiere
Kasch nur mit Bodyguard und Waffe go spaziere
Miir hänn kai Angscht, doch mir versteen die BaZ, denn – nur so im Verdraue:
Wäär ych dr Somm, wuurd ych mi au nimm uuse draue.

Dreydaagsfliege:
I ha mer letschti gsait, kumm kauf dr wider mool e BAZ
Noo bin-i an Kiosk und ha se gsuecht am alte Platz
Do sait mir doch d Kioskfrau: nai, die wirsch du do nid finde
Die hämmer syt Dezämber bi de Schmuddelheftli hinde.

Dromböösli:
S‘Trudi sitzt am Zmorgetisch näbe irem Schatz,
quält sich durch die Käsblatt-Zytig, är durch dr neuschti Spatz.
Do rieft dr Hansli ganz vergniegt: "Jezt muesch lose Vater!
Dr Somm und d‘BaZ sin mir bald loos, morn kunnt dr neu Bestatter!”

Heiri:
Jede Daag schrybt d Baasler Zytig vo Schleeger, Schiessereye,
vo Vergwaltiger und Däschedieb, vo settige, wo spraye.
Du gwöhnsch di an s Unglügg und Verbräche, findsch es nüm so gäil.
Jä, wotsch es richtig kriminell, denn liis dr Wirtschaftstäil.

Pierrot:
D BAZ wird glyy in Ziiri druggt,
also ich bi sicher nit verruggt,
denn s Niveau het mi scho immer gsteert,
jetzt isch si doch dert, wo si ane gheert.

Schnaabelwetzer:
Rumäänie schiggt Lasagneflaisch und Ängland schlächte Wyy
und s billigscht Händy fiere sy diräggt us Taiwan yy.
Ass jeede Ramsch vo usswäärts kunnt, das macht my nimm verruggt.
Denn schliesslig wird au d Basler Zytig jetz in Ziiri druggt.

Schnaabelwetzer:
Mir hänn dr Helgemooler gfrogt: Jä nai, waas hesch do gmoolt?!
Das isch e Lääser vo dr BaZ – lyycht gaischtig iberhoolt.
So scheps und maager wirsch, wenn du di mit dr BaZ bigniegsch
und jeedesmool vom Markus Somm vo rächts e Gläpper griegsch.

Schooffsuuri:
Y haa no e Draimli, das loss mer nit nää,
ass z Baasel emool e gueti Zyttig wird gää.
Aini wo ganz elai denne uns Baasler gheert,
E Zyttig wo kai Somm und kai Blocher drin steert.

Schwoobekäfer:
E Stinggdier het z Amerika, im Oschte wie im Weschte,
E miserable Ruef, wel s ebe alles duet verpeschte.
Bi uns het sone Stinggdier ganz e anderi Bedytig:
Das wird vereert als Chefredaggter vo dr Basler Zytig!

Schunggebegräbnis:
Zerscht d Crossair verkauft, denn d Swissair no grundet,
d BaZ fit gmacht für d SVP, d Hello jetzt gschtundet.
Es ligt, was dä Suter
aalängt, bald im Pflutter,
hett jetzt dää ächt, ganz subtil
au bi Swiss Ski d Händ im Schpiil?

Singvogel:
E Typ, wo alles besser wäiss, als Chefredaggter,
drzue baar Schryyberling mit Schnällschussgweer-Karaggter
plus äin, wo schlyymig pubertiert und denn verruggt wird:
S isch konsequänt, wenn jetz das Blatt in Züüri druggt wird.

Bild: FFGoatee auf flickr.com (CC BY 2.0)

Aktuell

alle Beiträge

Ihr Kommentar

Bitte füllen Sie alle Felder aus.
Ihre E-Mail-Adresse wird nicht veröffentlicht.

* = erforderlich

Sicherheitscode *